Jigar transplantatsiyasi oqibatida 32 yoshli bemor vafot etdi
O‘zbekistonda mustaqil jigar transplantatsiyasi muvaffaqiyatli o‘tkazilgan 32 yoshli bemor vafot etdi.
Qayd etilishicha, jarrohlik amaliyoti 16 sentyabrda amalga oshirilgan. Bemorning 28 yoshli rafiqasi o‘z jigarini turmush o‘rtog‘iga o‘tkazilishiga rozi bo‘lgan. Operatsiya davomiyligi texnik qiyinchiliklar bilan 14 soat mobaynida ijobiy yakunlangan, operatsiyadan so‘ng ham bemorning sog‘lig‘i yaxshi bo‘lgan. Ammo, 29 sentyabr kuni bemor vafot etdi.
Maʼlum qilinishicha, jarrohlik amaliyotiga boshchilik qilgan jarroh, professor Mirshavkat Akbarov vaziyatni quyidagicha izohladi:
Barcha operatsiyalar ham o‘ziga yarasha asoratlar bilan kechadi. Jigar operatsiyasida ham 75% asoratlar bo‘ladi. Lekin bu asoratlarning hammasi ham o‘lim bilan tugaydi degani emas.
Shuningdek, bemor Ahmedov O‘ktamning transplantatsiyadan keyin 5-6 kungacha ahvoli yaxshi bo‘lgan. Analizlari normallashgach, reanimatsiya xonasidan palataga ko‘chirilgan. Afsuski, yettinchi kuni bemorda birdaniga gemoglobin tushib, ahvoli og‘irlashadi. Tezkor tekshiruvlar natijasida, oshqozonda gepatagen yara paydo bo‘lgan va undan prafuz qon keta boshlagan.. Bemor immuniteti begona organ hisoblangan jigarni qabul qilishi uchun immunitetni tushirishga yana qo‘shimcha dorilar qilingan.
Maʼlumotlarga ko‘ra, bunday dorilarning, toksik taʼsiri mavjud bo‘lib bu bemorda ensofolopatiyani keltirib chiqardi. Oqibatda bemorga qon va qon preparatlarining quyilishi natijasida arterial tromboz kelib chiqqan. Va uni davolash uchun yana 7 soatlik operatsiya bo‘lib o‘tdi. Bemorning ahvoli muntazam nazorat qilib borilgan. Bemor buyrak va yurak yetishmovchiligi, siydik yo‘llaridagi muammolar tufayli vafot etgan.
Maʼlumot o‘rnida: bugungi kunda jigar transplantatsiyasi davlat tomonidan moliyalashtirilib kelinmoqda.
Eslatib o‘tamiz, avvalroq 2022 yil yakunigacha barcha hududda buyrak transplantatsiyasi amaliyoti yo'lga qo'yilishi haqida xabar berilgandi.
Cho‘lponoy Ahmedova
