Rossiya O‘zbekistonning 150 ming fuqarosiga mamlakatga kirishga qo‘yilgan taqiqni olib tashladi (video)
Rossiya Federatsiyasi Ichki ishlar vazirligi taqiqi bo‘lgan 150 ming o‘zbekistonlik va 150 ming tojikistonlik mehnat migranti uchun mamlakatga kirishga ruxsat berdi.
Migratsiya agentligining xabar berishicha, Rossiya migrantlar federatsiyasi rahbari Vadim Kojenovning maʼlum qilishicha, yuqoridagi migrantlar toifasiga faqat Ichki ishlar vazirligi tomonidan taqiq qo‘yilgan fuqarolar kiradi. Sud qarori bilan taqiqqa tushgan fuqarolar uchun Rossiya chegarasi belgilangan muddatga qadar yopiq hisoblanadi.
Qayd etilishicha, amnistiyaga tushgan fuqarolar joriy yil 18-avgust kuni maʼlumotlar bazasidan olib tashlangan. Shu bilan birga, fuqaro unga mamlakat hududiga kirishga ruxsat berilganiga ishonch hosil qilish uchun Ichki ishlar vazirligi saytidan maʼlumotlarni tekshirib ko‘rishi maqsadga muvofiq.
Shuningdek, migratsion ro‘yxatdan o‘tgan, lekin ruxsat beruvchi hujjatlarini joriy yil 30-sentabrgacha uzaytirishga ulgurmagan mehnat migrantlari shu yilning 30 dekabrigacha hujjatlarini rasmiylashtirishi mumkin.
Maʼlumot uchun, endilikda Rossiya hududida ishlash huquqini beruvchi patent olishda talab etiladigan tibbiy ko‘rik Rossiya Sog‘liqni saqlash vazirligi tomonidan Toshkentda o‘rnatilgan tibbiy asbob-uskunalar yordamida amalga oshiriladi.
Avvalroq о‘zbekistonlik quruvchilarni Rossiyada “kosmik istiqbollar” kutayotgani, Rossiyada migratsiya to‘g‘risida yagona hujjat joriy etilgani, o‘n ming о‘zbekistonlik yaqin vaqt davomida Rossiyaga ishga jalb qilinishi, Tashqi Mehnat migratsiyasi orqali ishlashga ketgan fuqarolarning noroziligi, shuningdek, Rossiyada yuz bergan ommaviy mushtlashuvda ishtirok etgan migrantlar 40 yilga deportatsiya qilingani hamda Rossiya migrantlarga yangi majburiyat yuklamoqchiligi haqida xabar berilgandi.
