“Suyunchi puli” endi bank plastik kartasiga ham o‘tkazib beriladi
Farzand tug‘ilganda beriladigan bir martalik nafaqa to‘lovi Xalq banki tomonidan naqd pul shaklida amalga oshirilayotgan edi. Bu esa FHDYO bo‘limlarida joylashgan bank kassalari oldida uzundan-uzun navbatlar yuzaga kelishiga sabab bo‘lmoqda.
Davlat xizmatlari agentligi tomonidan fuqarolarga yana-da qulaylik yaratish maqsadida, “FHDYOning yagona elektron arxivi” axborot tizimida farzand tug‘ilganda beriladigan bir martalik nafaqa to‘lovi (“suyunchi puli”) ni ota-onadan birining bank plastik kartochkasiga o‘tkazib berish imkoniyati yaratildi. Albatta, bu tizim ixtiyoriy tarzda amalga oshiriladi.
Bunda FHDYO bo‘limining masʼul xodimi ota yoki onaning xohishiga asosan faol holatda bo‘lgan bank plastik kartochkasini maxsus belgi orqali tanlaydi. Shundan so‘ng bir martalik to‘lovni bank plastik kartasiga yo‘naltiradi.
Xalq banki tomonidan “suyunchi puli” qisqa muddatda fuqaroning bank plastik kartochkasiga o‘tkazib beriladi.
Avvalroq “Bolalar puli” bola soniga qarab belgilanishi, farzandli bo‘lgan talabaga taʼlim muassasasi bir martalik nafaqa puli berishi hamda Nogiron farzandi bor onalarga pensiyaga chiqishida qanday imtiyozlar belgilanishi haqida xabar berilgandi.
Olamgir Abdiyev
