Go‘sht, baliq, kartoshka mahsulotlari QQSdan ozod qilinadi
"O‘zbekiston Respublikasi Soliq kodeksiga aholini asosiy turdagi oziq-ovqat mahsulotlari bilan kafolatli taʼminlashga qaratilgan qo‘shimcha kiritish to‘g‘risida"gi Qonun Prezident tomonidan imzolandi.
Avvalroq Senat yalpi majlisida “O‘zbekiston Respublikasining Soliq kodeksiga aholini asosiy turdagi oziq-ovqat mahsulotlari bilan kafolatli taʼminlashga qaratilgan qo‘shimcha kiritish to‘g‘risida”gi qonun ko‘rib chiqilib, senatorlar tomonidan maʼqullangandi.
Unga ko‘ra, 2021-yil 10-oktabrdan 31-dekabrgacha bo‘lgan davrda go‘sht (mol, qo‘y, tovuq), tirik hayvonlar (qoramol va parranda) va ularni so‘yishdan olinadigan mahsulotlarni, kartoshkani hamda muzlatilgan baliqni realizatsiya qilish bo‘yicha aylanma, shuningdek ularni O‘zbekistonga olib kirish qo‘shilgan qiymat solig‘idan ozod qilinadi.
Maʼlumot uchun, mazkur Qonun rasmiy eʼlon qilingan kundan eʼtiboran kuchga kiradi.
Eslatib o‘tamiz, go‘sht (mol, qo‘y, tovuq), tirik hayvonlar (qoramol va parranda) va ularni so‘yish mahsulotlari, kartoshka hamda muzlatilgan baliqni O‘zbekistonga olib kirish, ularni sotish bo‘yicha aylanmalarni QQSdan ozod qilishni nazarda tutuvchi qonun loyihasi ishlab chiqilgandi.
Avvalroq mevalar bojxona bojidan ozod qilinishi, asosiy oziq-ovqat mahsulotlarining narxlari keskin oshishi mumkinligi, o‘simlik moyiga bo‘lgan yillik ehtiyoji qanchaligi hamda dunyoda yil boshidan buyon ilk bor oziq-ovqat narxlari pasaygani haqida xabar berilgandi.
