“Barselona” klubida norozilik boshlandi
Kataloniyaliklar klub shifokorlari ishidan xavotirda.
Xabarlarga ko‘ra, futbolchilarning juda ko‘p jarohat olishlari aynan shifokorlarning muvaffaqiyatsizligi bilan bog‘liq hisoblanadi.
Futbolchilar joriy mavsumda jamoa shifokorlari bilan qattiq tortishgani aytilmoqda. Shu bilan birga, tibbiyot shtabi xodimlari “Barselona”ning avvalgi murabbiyi Ronald Kuman va uning yordamchilari bilan ham bahslashgan.
Hozirda “Barselona” klubiga yangi murabbiy sifatida saylangan Xavi ham shifokorlar ishidan xavotirda ekanligini aytib o‘tgan. U klubning sport direktori Mateu Alemani bilan vaziyatni muhokama qilishga ham ulgurgan.
Hozirda “Barselona” shifoxonasida 11 nafar futbolchi davolanmoqda. Pedri, Dembele, Roberto, Gonsales, Pike, Garsiya va Fatida oyoq mushaklari bilan bog‘liq muammolar bor. Neto grippga chalingan, Aguero esa yurak og‘rig‘ini boshdan kechirmoqda. Braytwaite tizzasida operatsiya qilingan bo‘lsa, Destda bel og‘rig‘i mavjud.
Eslatib o‘tamiz, ayni damda “Barselona” klubi Ispaniya chempionatining turnir jadvalida 17 ochko jamg‘argan holda 9-o‘rinni egallab turibdi.
Avvalroq Xavi bilan muzokaralar ko‘ngildagidek o‘tgani va investitsiya fondlari “Barselona”ga Holandni sotib olishga yordam bermoqchiligi haqida xabar berilgandi.
Jamshidbek Amirov
