Mirishkorda MCHJ sobiq direktori 600 million so‘mdan ziyod chorva mollarni "uxlatib ketdi"
U sotuvdan tushgan mablag‘larni jamiyat hisob raqamiga kirim qilmasdan talon-tаroj qilgani aniqlangan.
Bosh prokuratura huzuridagi Iqtisodiy jinoyatlarga qarshi kurashish departamenti xabariga ko‘ra, departamentning Mirishkor tuman bo‘limi tomonidan “O‘zbekiston qorako‘lchilik” MCHJning Mirishkor tuman filialining murojaatiga asosan tergov o‘tkazildi.
Maʼlum qilinishicha, tergovga qadar tekshiruvda MCHJ sobiq rahbari Ch.X. o‘zining javobgarligida bo‘lgan umumiy bahosi 604,7 million so‘mlik jami 2 429 bosh mayda shoxli mollarni sotib yuborib, sotuvdan tushgan mablag‘larni jamiyat hisob raqamiga kirim qilmasdan talon-toroj qilgani aniqlangan.
Mazkur holat yuzasidan Jinoyat kodeksining 167-moddasi (talon-toroj qilish) va 205-moddasi (hokimiyat yoki mansab vakolatini suiisteʼmol qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq 447 ta shirkatda 163 ta 12,9 milliard so‘m miqdoridagi qonunbuzarlik holati aniqlangani, Toshkentda 400 million so‘mdan ortiq pulni talon-taroj qilgan shirkat rahbari qo‘lga tushgani, Termiz shahrida ko‘mir mahsuloti talon-tаroj qilingani hamda Marg‘ilonda XTB sobiq mudiri 1,7 milliard so‘mni o‘zlashtirib yuborgani haqida xabar berilgandi.
