Термиз шаҳрида кўмир маҳсулоти талон-торож қилингани маълум бўлди
Кўмир ўғриларига жиноий иш қўзғатилди.
Бош прокуратура ҳузуридаги Департаментнинг Термиз шаҳар бўлими томонидан “Кўмир таъминот” МЧЖнинг мурожаатига асосан терговга қадар текширув ўтказилди. Унда МЧЖнинг Сурхондарё вилояти филиали собиқ бошлиғи С.Э. ва омбор мудири М.Х.лар расмий ҳужжатларга била туриб сохта маълумотлар киритиш йўли билан аҳоли ва ижтимоий соҳа объектлари эҳтиёжи учун ажратилган 85,2 тонна кўмир маҳсулотини ўзлаштириш йўли билан талон-тарож қилганликлари аниқланган.
Мазкур ҳолат юзасидан Жиноят кодексининг 167-моддаси (талон-торож қилиш) ва 209-моддаси (мансаб сохтакорлиги) билан жиноят иши қўзғатилиб, тергов ҳаракатлари ўтказилмоқда.
Аввалроқ 447 та ширкатда 163 та 12,9 миллиард сўм миқдоридаги қонунбузарлик ҳолати аниқлангани ҳамда Cамарқандда боғчадан гўштни ўғирламоқчи бўлган шахсларга жиноят иши қўзғатилгани ҳақида хабар берилганди.
Муножат Валиева
