Sog‘liqni saqlash vazirligi tizimida qariyb 10 milliardlik mablag‘ talon–taroj qilindi
Ushbu holat yuzasidan Jinoyat kodeksining 167-moddasi 3-qismi “a” bandi bilan jinoyat ishi qo‘zg‘atildi.
Qayd etilishicha, tibbiyot xodimlarining kasbiy malakasini rivojlantirish markazining ko‘p tarmoqli klinikasida byudjet mablag‘larining to‘g‘ri yo‘naltirilishi bo‘yicha tekshiruv o‘tkazildi.
Tekshiruvda klinika mansabdor shaxslari va xodimlari tomonidan byudjet mablag‘larining maqsadsiz sarf qilinishi, o‘zlashtirishidagi noqonuniy faoliyati tekshirildi. Shuningdek, talon-taroj qilish holatlari, aslida ishlamagan xodimlar uchun oylik ish haqlari to‘lab kelinishi, tibbiyot texnikalaridan foydalanish, pullik tibbiy xizmat ko‘rsatishdan tushgan mablag‘larning maqsadsiz sarflanishi, davlat xaridlarini amalga oshirishda bir qator qonunbuzilishi holatlari aniqlangan.
Maʼlum bo‘lishicha, klinika faoliyatida jami 9 mlrd. 747 mln. 598 ming so‘mlik moliyaviy xato va kamchiliklar aniqlangan bo‘lib, shundan 586.798.200 ming so‘mlik byudjet mablag‘lari rastrata qilish yo‘li bilan talon-taroj qilinganligi fosh etildi.
Bosh prokuratura Agentlik tomonidan taqdim etilgan hujjatlar asosida prokuraturasi huzuridagi Iqtisodiy jinoyatlarga qarshi kurashish departamenti tomonidan Tibbiyot xodimlarining kasbiy malakasini rivojlantirish markazining ko‘p tarmoqli klinikasi mansabdor shaxslariga nisbatan jinoyat ishi ochildi.
Hozirda tergov harakatlari olib borilmoqda.
Eslatib o‘tamiz, avvalroq 447 ta shirkatda 163 ta 12,9 milliard so‘m miqdoridagi qonunbuzarlik holati aniqlangani hamda Sergelida 325 ming dollarni o‘zlashtirib yuborgan bank kassiri va bosh mutaxassisga nisbatan jinoyat ishi qo‘zg‘atilgani haqida xabar berilgandi.
Cho‘lponoy Ahmedova
