Endi davlat korrupsiya haqida xabar berganlarning qarindoshlarini ham o‘z himoyasiga oladi
Korrupsiyaga oid huquqbuzarliklar to‘g‘risida axborot berayotgan shaxslarning qarindoshlari ham davlat himoyasida bo‘lishi belgilandi. Ilgari faqat xabar bergan shaxslar uchungina bu tartib amal qilar edi.
“O‘zbekiston Respublikasining Korrupsiyaga qarshi kurashish tizimini takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi Qonun Prezident tomonidan imzolandi.
Unga ko‘ra, Korrupsiyaga qarshi kurashish agentligi xodimlari korrupsiyaviy huquqbuzarliklar sodir etilishini o‘rganish va tahlil qilish uchun jazoni ijro etish muassasalariga moneliksiz kirishga haqli hisoblanadi. Shuningdek, mazkur tashkilotlarning hujjatlari bilan tanishish uchun ham agentlikka vakolat beriladi.
Bundan tashqari, agentlik har yili Korrupsiyaga qarshi kurashish to‘g‘risidagi milliy maʼruzani Oliy Majlisga taqdim etib borishi belgilandi.
Eslatma. Qonun rasmiy eʼlon qilingan kundan eʼtiboran kuchga kiradi.
Avvalroq Sog‘liqni saqlash vazirligi tizimida qariyb 10 milliardlik mablag‘ talon–taroj qilingani, endi korrupsionerlarga belgilangan jazo yengillashtirilmasligi hamda korrupsionerlar ro‘yxati tuzilgani haqida xabar berilgandi.
Olamgir Abdiyev
