Misrda ikki poyezd to‘qnashdi: 64 kishi jarohatlandi
Halok bo‘lganlar bor-yo‘qligi hozircha aniqlanmagan.
Misrning Giza viloyatida ikki yo‘lovchi poyezdi to‘qnashib ketdi. Hodisa oqibatida 64 kishi jarohatlangan, halok bo‘lganlar bor-yo‘qligi hozircha ma’lum emas.
To‘qnashuv 8-noyabr kuni Qohira yaqinidagi Al-Ayyat tumanida sodir bo‘lgan. Giza va Fayum shaharlari o‘rtasida harakatlanayotgan poyezd Qohira–Asvon yo‘nalishidagi boshqa poyezdning orqa qismiga borib urilgan. Zarba oqibatida poyezdlardan biri relsdan chiqib ketgan.
Misr Sog‘liqni saqlash vazirligi ma’lumotiga ko‘ra, jarohatlanganlar yaqin atrofdagi shifoxonalarga olib borilgan. Hodisa joyiga vayronalarni tozalash va poyezdlar harakatini tiklash uchun qutqaruv guruhlari hamda kranlar yuborilgan.
Ma’lumot uchun, o‘tgan yil sentyabr oyida ham Al-Ayyat tumanida ikkita yuk poyezdi to‘qnashib ketgan. O‘shanda mashinist va uning yordamchisi jarohatlangan.
