Buxoroda qo‘lga olingan qidiruvdagi shaxs IIB xodimiga pora taklif qildi
U 4 million 200 ming so‘m va 100 AQSH dollarini pora tariqasida bergan.
So‘nggi kunlarda turli soha xodimlariga pora berganlarning ushlangani to‘g‘risidagi xabarlar ko‘p uchramoqda. Eng achinarlisi, pora bergan shaxslar javobgarlikka tortilmoqda. Biroq, pora berishga undaganlar esa javobgarlikdan chetda qolmoqda.
O‘zbekiston Respublikasi IIV Shaxsiy xavfsizlik bosh boshqarmasi Buxoro viloyati bo‘yicha bo‘limi, Departamentning viloyat boshqarmasi hamda viloyat prokuraturasi xodimlari hamkorligida Buxoro shahar Ichki ishlar organlari faoliyatini muvofiqlashtirish boshqarmasi jinoyat qidiruv bo‘limi katta tezkor vakilining Ichki ishlar boshqarmasi boshlig‘i nomiga yozgan bildirgisi asosida tezkor tadbir o‘tkazildi.
Buxoro viloyati IIB axborot xizmati xabariga ko‘ra, joriy yilning 12-noyabr kuni Jinoyat ishlari bo‘yicha Guliston shahar sudi tomonidan O‘zbekiston Respublikasi JK.ning 168-moddasi 3-qismi “B” bandida ko‘rsatilgan jinoyatni sodir etganlikda aybli deb topilgan. Aniqlanishicha, sud-tergov organlaridan yashirinib yurganligi uchun sirtdan “qamoqqa olish” tarzidagi ehtiyot chorasi qo‘llanilgan holda qidiruv eʼlon qilingan.
Maʼlum bo‘lishicha, taxminan soat 21:00 larda Buxoro shahar IIO FMB 4-sonli IIB binosidagi xizmat xonada tezkor xodimga 4 million 200 ming so‘m va 100 AQSH dollarini pora tariqasida bergan vaqtda ushlanib, belgilangan tartibda hujjatlashtirilgan.
Qayd etilishicha, Buxoro shahar IIO va FMB xodimlari tomonidan o‘tkazilgan “Qidiruv” tezkor profilaktik tadbiri davomida Buxoro shahrida qo‘lga olingan. Sirdaryo viloyati Boyovut tumani Boyovut-1 mahallasida ro‘yxatda turuvchi 1983 yilda tug‘ilgan Yu.J., o‘ziga nisbatan “qamoqqa olish” tarzidagi ehtiyot chorasini qo‘llamaslik evaziga ichki ishlar organi xodimiga 500 AQSH dollari pora berishni taklif qilgan.
Hozirda ushbu holat Yu.J.ga nisbatan O‘zbekiston Respublikasi JK.ning 211-moddasi 1-qismi bilan jinoyat ishi qo‘zg‘atilib, dastlabki tergov harakatlari davom ettirilmoqda.
Eslatib o‘tamiz, Qo‘qon shahrida IIO xodimiga pora bermoqchi bo‘lgan shaxs qo‘lga olingandi.
Avvalroq Bosh prokuratura huzuridagi Departamentning Xiva tuman bo‘limi tomonidan firibgarlik jinoyati, Andijonda tijoratda pora evaziga og‘dirib olish holati fosh bo‘lgani, Toshkent viloyatida fuqaroni ozodlikka chiqarib berishni vaʼda qilgan firibgarlar qo‘lga tushgani hamda qonun himoyachisi jinoyat ustida qo‘lga olingani haqida xabar berilgandi.
