Tanzila Norboyeva Mirishkor hokimi qarorini bekor qildi
Senat qarorining ijrosi taʼminlanmay qolayotgani aytilmoqda.
Oliy Majlisi Senatining o‘n uchinchi yalpi majlisida xalq deputatlari mahalliy Kengashlarining ayrim qarorlarini bekor qilish to‘g‘risidagi masala ko‘rib chiqilgandi.
Мazkur majlisda Xalq deputatlari Mirishkor tumani kengashining 2020 yil 19-noyabrdagi “Mirishkor tumanidagi ayrim fermer xo‘jaliklari tomonidan ajratilgan yer maydonlaridan samarali va maqsadli foydalanish ahvoli, 2020 yilda davlatga paxta sotish bo‘yicha tuzilgan kontraksiya shartnomalarining bajarilishini taʼminlash chora- tadbirlari to‘g‘risida”gi 67/16-6 sonli qarori qonunchilikka zid deb topilib, bekor qilinishi belgilandi.
Bu borada O‘zbekiston Respublikasi Oliy Majlisi Senati raisi imzosi bilan qaror ham qabul qilingan.
Aniqlanishicha, Mirishkor tumani Do‘stlik mahallasida faoliyat olib borayotgan bir guruh fermerlarga ajratilgan yer maydonlari 2020 yil noyabr oyida fermerlarning roziligisiz, Xalq deputatlari Mirishkor tumani kengashi deputatlari ishtirokida muhokamaga qo‘yilib, qaytarib olingan. Senat deputatlar va hokimning bu xatti-harakatini qonunga zid deb topsada, haligacha fermerlardan olib qo‘yilgan yer maydonlari qaytarib berilmayapti.
Hududda faoliyat olib borayotgan fermerlarning aytishicha, ularga 49 yilga ijaraga berilgan yerlarda hozirda klaster faoliyat ko‘rsatmoqda.
Fermerlardan biri G‘olib Maxatov tuman hokimining qishloq xo‘jaligi masalalari bo‘yicha o‘rinbosari Jahongir Abdinazarovga ham murojaat qilganini, ammo antiqa javob olganini qo‘shimcha qildi:
“Bu o‘rinbosarga, Senat raisining qarori borku, nega yerlarimiz qaytarilmayapti deb yuzlanganimzda, “Tanzila Norboyeva qaror chiqargan bo‘lsa, kelib masalani o‘zi hal qilib bersin” deb aytdi.
Maʼlumot uchun: tez orada Xalq deputatlari Mirishkor tumani kengashining qonunga zid chiqarilgan qaroridan aziyat chekayotgan fermerlar haqida videolavha ham namoyish etiladi.
Eslatib o‘tamiz, avvalroq Qashqadaryoda deputatlarning ruxsatisiz 10 milliard so‘mga yaqin mablag‘ ishlatib yuborilgani maʼlum bo‘lgani hamda ilmiy faoliyat bilan shug‘ullanuvchi ayollar asosan Toshkent shahrida yig‘ilgani haqida xabar berilgandi.
Cho‘lponoy Ahmedova
