Qashqadaryoda tibbiy uskunalarning xaridi bilan bog‘liq noqonuniy harakatlar aniqlandi
Mansabdor shaxslarga nisbatan Jinoyat kodeksining 167-moddasi 3-qismi “a” bandi bilan jinoyat ishi qo‘zg‘atildi.
Korrupsiyaga qarshi kurashish agentligi tomonidan Qashqadaryo viloyatida tibbiy uskunalar xarid qilinishining qonuniyligi o‘rganilgandi.
2020 yil va 2021 yilning 1-yarim yili davomida 10 ta tibbiyot muassasalari tomonidan 75 dona jami 7 milliard 817,6 million so‘mlik tibbiy uskunalar Qarshi shahridagi masʼuliyati cheklangan jamiyatdan shartnoma asosida juda qimmat narxlarda byudjet mablag‘lari hisobiga sotib olinganligi aniqlandi.
X.Sulaymonova nomidagi Respublika ekspertiza markazining Qashqadaryo viloyati bo‘limi ekspertlari tomonidan dastlabki baholash ishlari yakunlariga ko‘ra, 65 dona 43 turdagi tibbiy uskunalari tibbiyot muassasalari tomonidan 5 milliard 421,4 million so‘mga xarid qilingan
Ekspert xulosasiga ko‘ra, haqiqatda, 2 milliard 808,1 million so‘mlik qiymatga ega ekanligi, yaʼni 2 milliard 613,3 million so‘mga qimmat narxlarda sotib olinganligi maʼlum bo‘ldi.
Eslatib o‘tamiz, avvalroq O‘zbekistonda 190 ta normativ-huquqiy hujjat korrupsiyaga qarshi ekspertizadan o‘tkazilishi hamda sog‘liqni saqlash tizimida 30 milliard so‘mdan ortiq mablag‘ talon-toroj qilingani maʼlum bo‘lgani haqida xabar berilgandi.
Cho‘lponoy Ahmedova
