Saakashvili yangi talablarini ma’lum qildi
Aks holda u yana ochlikni boshlash bilan tahdid qilgan.
Gruziya sobiq prezidenti Mixail Saakashvili o‘z kamerasiga chet ellik vrachlarni kiritishni talab qildi. Bu haqda 3 yanvar kuni uning advokati Shota Tutberidze jurnalistlarga ma’lum qilgan.
“Biz Mixail Saakashvilining davolanishi jarayoniga AQSH, Ukraina va Niderlandiya vrachlarining darhol jalb qilinishini talab qilamiz. Bundan tashqari, bizning sobiq prezident bilan maxfiy muloqot qilish imkonimiz yo‘q, bu esa advokat va himoyadagi shaxsning fundamental huquqlarining buzilishi hisoblanadi”, – degan u.
Aks holda sobiq prezident ochlikni qayta tiklashi ma’lum qilingan.
Ma’lumot o‘rnida: Mixail Saakashvili 2004-2013 yillarda Gruziya prezidenti bo‘lgan. 2013-yilda mamlakatni tark etgan. Shundan keyin u Ukraina fuqaroligini qabul qildi.
2021-yil 1-oktyabr kuni Saakashvili qo‘lga olindi. U Gruziyaga mahalliy o‘zini o‘zi boshqarish organlariga saylov arafasida kirib kelgan.
Avvalroq Saakashvili tarafdorlari ochlikni to‘xtatgani haqida xabar berilgandi.
Jahongir Qo'ziyev
