Yevropa davlatlaridan birining mudofaa vazirligi kiberhujumga uchradi
Oqibatda vazirlik pochta tizimi to‘rt haftaga ishdan chiqqan.
Belgiya mudofaa vazirligi elektron pochta tizimi xakerlar hujumi tufayli to‘rt hafta davomida ishlamagan. Bu haqda vazirlik matbuot kotibi Lyudivin Dedonder maʼlum qildi.
Maʼlumotlarga ko‘ra, mudofaa vazirligi xodimlari 2021 yil 16 dekabrda kiberhujum sodir bo‘lganini qayd etishgan. Ularga jo‘natilgan elektron xatlarni ko‘rish mumkin bo‘lgan, ammo xodimlar javob maktublarini jo‘nata olmagan.
Dedonderning maʼlum qilishicha, faqatgina 11 yanvar kuni pochta tizimi qayta tiklangan. Uning faoliyatidagi uzilishlarni amaldor butun yozishmalar tizimining o‘chirib qo‘yilgani bilan bog‘lagan.
Avvalroq AQSH Eron xakerlarini prezident sayloviga aralashishda ayblagani haqida xabar qilingandi.
Jahongir Qo‘ziyev
