Xorvatiya prezidenti Bosh vazirni "Ukraina agenti" deb atadi
Shuningdek, u Rossiyaning dushmani yoki Ukrainaning do‘sti emasliginini aytib o‘tgan.
Xorvatiya prezidenti Zoran Milanovich Ukraina Yevroittifoq tomonidan aldanayotganini aytdi. U Bryusselning Kiyevga nisbatan munosabatini mas’uliyatsizlik deb baholadi.
"Bryusselning boshqa davlatlar ustidan kulgan byurokratlari Ukraina ustidan ham kulmoqda. Ular tuman sotish va qandaydir statusni va’da qilish bilan shug‘ullanadi. YI ma’lumotiga ko‘ra, mamlakat o‘ta og‘ir ahvolda. Qachonlardir u rivojlangan davlat bo‘lgan, ammo hozir Ukraina YAIMning aholi jon boshiga tushadigan miqdori Kosovo bilan bir xil darajada. Bu Yevropa yoki Bryussel siyosatchilarining muvaffaqiyatimi?", - dedi Milanovich.
Oldinroq prezident Ukrainani korrupsiyaga eng ko‘p botgan davlat deb atagan.
Prezident so‘zlari ortidan Xorvatiya bosh vaziri Andrey Plenkovich Ukrainadan rasman uzr so‘radi va hukumat pozisiyasi prezidentning qarashi bilan bir-biriga mos kelmasligini aytdi.
Bunga javoban Milanovich Plenkovich "o‘zini Ukraina agentidek" tutayotganini aytib, o‘z so‘zlaridan tonmasligini ma'lum qilgan.
