Zelenskiy Putinni "gaplashib olish"ga chaqirdi
Ukraina rahbariga ko'ra, uchrashuv qayerda va qanday formatda bo'lib o'tishi muhim emas.
Ukraina prezidenti Vladimir Zelenskiy Rossiya prezidenti Vladimir Putinni yana bir bor uchrashishga taklif qildi. Bu haqda u Myunxen xavfsizlik konferensiyasidagi chiqishi chog‘ida aytib o‘tdi.
"Rossiya Federatsiyasi prezidenti nimani xohlayotganini bilmayman, shuning uchun men uchrashishni taklif qilaman", dedi Zelenskiy.
Shuningdek, u Ukraina urushni to‘xtatish bo‘yicha barcha mumkin bo‘lgan formatlarda va barcha mumkin bo‘lgan platformalarda muzokaralar olib borishga tayyorligini aytdi.
"Parij, Berlin, Minsk, Istanbul, Jeneva, Bryussel, Nyu-York yoki Pekin - men uchun dunyoning qayerida Ukrainada tinchlik muzokaralari olib borilishi muhim emas. Bu to'rtta davlat ishtirokidami, yettita yoki yuztami farqi yo'q, asosiysi, ular orasida Ukraina ham, Rossiya ham bo'lishi kerak. Umid qilamanki, hech kim Ukrainani G'arb va Rossiya Federatsiyasi o'rtasidagi qulay va "abadiy" bufer deb hisoblamaydi. Bu sodir bo'lmaydi, hech kim bunga yo'l qo'ymaydi. Aks holda, savol tug'iladi - navbatdagi kim? ”, dedi Zelenskiy.
Eslatib o‘tamiz, avvalroq Zelenskiy Buyuk Britaniya bosh vaziri Boris Jonson bilan uchrashgan edi.
