Samarqandda Amir Temur qabri ochildimi?
Fanlar akademiyasi axborot xizmati holat yuzasidan munosabat bildirdi.
Samarqandda joylashgan Go‘ri Amir maqbarasidagi Amir Temur qabri ochilgani haqida xabar tarqaldi.
Qayd etilishicha, mazkur holat akademiyada muhokama qilinmagan va kun tartibiga kiritilmagan.
"Ushbu xabar yolg‘on (feyk) xabar hisoblanib, Fanlar akademiyasida ushbu masala muhokama qilinmagan va kun tartibiga qo‘yilmagan. Arxeologlar tomonidan ham hech qanday qazishmalar olib borilmagan va rejalashtirilmagan. Shu bilan bir qatorda xabarda keltirilgan qazishma rahbari deb aytilgan Toshmuhammad Niyozovich Qori-Niyoziy 1970 yilda vafot etgan bo‘lib, birinchi O‘zR Fanlar akademiyasi prezidenti hisoblanadi. Umuman olganda ushbu xabar 1941 yildagi maʼlumotlar asosida tayyorlangan", — deyiladi xabarda.
Maʼlumot o‘rnida, maqbara 1941-yilning 16–22 iyun kunlari hukumatning maxsus qarori bilan ochilgan bo‘lib, ekspeditsiyaga professor Qori-Niyoziy rahbarlik qilgan. Dastlab Amir Temur o‘g‘illari Mironshoh, Mirzo Shohrux, nevarasi Mirzo Ulug‘bek, 1941-yilning 19-iyunida Amir Temur qabri ochilgan. Undan so‘ng Amir Temurning nevarasi Muhammad Sultonning qabri ham ochilgan. Antropolog M.M.Gerasimov o‘zi yaratgan usul bilan Amir Temur, Mironshoh, Shohrux, Mirzo Ulug‘bek va Muhammad Sultonlarning hujjatli portretlarini yaratgan. 1942 yilning oxirlariga kelib, Amir Temur maqbarasidan qazib olingan suyaklar ilmiy jihatdan o‘rganib bo‘lingach, qaytadan o‘z joylariga dafn etilgan.
