Turkmaniston hukumati iste’foga chiqdi
Sardor Berdimuhammedov inauguratsiyasida yana qanday masalalar ko‘tarildi?
Sardor Berdimuhammedov Tukmanistonning neytral tashqi siyosiy kursini saqlab qolishini ma’lum qildi. Bu haqda u inaugurasiya marosimida aytgan.
“Biz dunyodagi barcha davlat va xalqlarga ochiqmiz hamda ular bilan savdo-iqtisodiy, madaniy-gumanitar va ilmiy aloqalarni rivojlantirishni maqsad qilganmiz”, degan u.
Shuningdek, Turkmaniston prezidenti o‘z faoliyatidagi eng muhim yo‘nalishlardan birini ma’lum qilgan. Berdimuhammedov Turkmanistonning neft-gaz sektorini rivojlantirmoqchi va uning xalqaro energetika tizimiga integrasiya qilmoqchi. Bundan tashqari, logistika salohiyatini yuksaltirish zarurligi ta’kidlandi. Berdimuhammedovning fikricha, Turkmaniston “Buyuk ipak yo‘linining yuragi sifatida geografik va boshqa ustunliklar evaziga” mintaqaviy va qit’aning yirik savdo marshrutlari birlashgan nuqtaga aylanishi mumkin.
Bundan tashqari, Berdimuhammedov hukumatni iste’foga chiqardi. Shu bilan birga, vazirlar yangi hukumat shakllangunga qadar o‘z vazifasini bajarishda davom etadi.
Avvalroq Sardor Berdimuhammedov rasman Turkmaniston prezidenti lavozimiga kirishgani to‘g‘risida xabar berilgandi.
