Samarqandda mast erkak “Neksiya–2”ni o‘g‘irlab, “Damas” bilan YTHga uchradi
Hozirda qonunbuzarga nisbatan jinoyat ishi ochilgan.
Narpay tumaninining Voriston qishlog‘ida mast erkak 24 yoshli haydovchiga tegishli avtomashinani olib qochib, YTHga uchradi. Bu haqda IIV huzuridagi Tergov departamenti axborot xizmati xabar berdi.
Ma’lum qilinishicha, erkak “Neksiya–2” rusumli transport vositasining eshiklari ochiqligi va kaliti o‘zida ekanidan foydalanib, uni noma’lum tomonga olib ketgan. Shundan so‘ng u “Samarqand–Buxoro” yo‘nalishidagi avtomobil yo‘lida qarama-qarshi yo‘nalishda harakatlanib kelayotgan “Damas” avtomashinasi bilan to‘qnashib, YTH sodir etgan va voqea joyidan yashiringan.
Tuman IIB tomonidan olib borilgan tezkor harakatlar natijasida qonunbuzar protsessual tartibda ushlangan.
Hozirda mazkur holat yuzasidan Jinoyat kodeksining 267-moddasi 1-qismi (transport vositasini olib qochish) bilan ish ochilib, tergov harakatlari olib borilmoqda.
Avvalroq Samarqand shahrining “Firdavsiy” ko‘chasida Neksiya haydovchisi piyodani urib yuborgani xabar qilingandi.
Javohirbek TURSUNOV
