Ochlar isyoni sodir bo‘lishi xavfi bor — JST
Shuningdek, Ukrainadagi urushning oziq-ovqat bozoriga taʼsiri ochiqlandi.
Butun dunyoda oziq-ovqat mahsulotlari narxining o‘sishi eng qashshoq davlatlarda ochlik bilan bog‘liq isyonlarga sabab bo‘lishi mumkin. Bu haqda Jahon savdo tashkiloti bosh direktori Ngozi Okonjo-Iveala maʼlum qildi.
"Biz o‘ta ehtiyotkor bo‘lishimiz kerak. Oziq-ovqat mahsulotlari narxining o‘sishi va ochlikning taʼsiri keyingi ikki yilda yana-da sezilishi mumkin. Ovqat va energiya butun dunyodagi kambag‘allar isteʼmol savatida eng ko‘p o‘rin egallaydi", — degan u.
Shuningdek, Okonjo-Iveala bu yil Ukrainada urug‘ ekish mavsumi bo‘lmasligidan xavotir bildirgan. Butunjahon oziq-ovqat dasturi zaxirasidagi bug‘doyning yarmini aynan Ukraina yetkazib beradi.
"Agar biz urush taʼsirini kamaytirishining chorasini ko‘rmasak, shu va keyingi yillarda yana bir halokatning guvohi bo‘lamiz", — deb taʼkidlagan Okonjo-Iveala.
U 2000 yillarning ikkinchi yarmida ayrim davlatlarda kuzatilgan ochlar isyoni qayta yuz berishidan ogohlantirgan.
Eslatib o‘tamiz, avvalroq "katta yettilik"ning oziq-ovqat tanqisligiga qarshi kurashishga kelishib olgani maʼlum qilingandi.
