Andijonda temiryo‘l stansiyasi xodimi pora bilan ushlandi
U stansiya hududiga tegishli yer maydonini pullamoqchi bo‘lgan.
Bosh prokuratura huzuridagi Departament hamda DXXning Izboskan tumani bo‘limlari tomonidan o‘tkazilgan tezkor tadbirda “Poytug‘ temir yo‘l stansiyasi” boshlig‘i vazifasini bajaruvchi xodim fermer xo‘jaligi rahbari va uning akasiga Izboskan tumani temir yo‘l stansiyasi tasarrufidagi yer maydonlari hisobidan jami 0,20 gektar yer maydonini yuqori lavozimlarda ishlovchi tanishi orqali ajratib berish va kelgusida kadastr hujjatlarini rasmiylashtirib berish evaziga 8 000 AQSH dollarini firibgarlik yo‘li bilan olgan vaqtida ashyoviy dalillar bilan ushlangan.
Hozirda mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
