G‘azoda Isroil hujumlari: sakkiz nafar falastinlik halok bo‘ldi
Halok bo‘lganlar orasida to‘rt yoshli bola ham bor. Hujumlar G‘azoning janubidagi Xon Yunis va shimolidagi G‘azo shahrida sodir etilgan.
Isroil armiyasining G‘azo sektoriga uyushtirgan dron hujumlari oqibatida kamida sakkiz nafar falastinlik, jumladan, to‘rt yoshli bola halok bo‘ldi. Bu haqda Al Jazeera xabar berdi.
Ma’lum qilinishicha, G‘azoning janubidagi Xon Yunis shahri yaqinidagi al-Mavasi hududida politsiya xodimlariga dron orqali zarba berilgan. Oqibatda besh nafar politsiyachi halok bo‘lgan, yana bir necha kishi jarohatlangan. Falastin Ichki ishlar vazirligi xodimlar xizmat vazifasini bajarayotgan vaqtda nishonga olinganini bildirgan.
G‘azo shahrining Rimal mahallasiga berilgan navbatdagi zarba oqibatida esa kamida uch kishi, jumladan, to‘rt yoshli bola halok bo‘lgan. Shuningdek, avvalgi hujumda yaralangan yana bir kishi vafot etgan.
HAMAS Isroilning hujumlarini qoralab, ularni «qasddan sodir etilgan harbiy jinoyat» deb atadi. Harakat bayonotida politsiyachilarning nishonga olinishi G‘azo sektorida barqarorlikni izdan chiqarish va tiklanish ishlariga to‘sqinlik qilishga qaratilgani ta’kidlangan.
Isroil armiyasi esa janubdagi hujumda «terrorchi» nishonga olinganini ma’lum qilgan.
Qayd etilishicha, AQSh vositachiligida 2025-yil oktyabr oyida kuchga kirgan o‘t ochishni to‘xtatish kelishuviga qaramay, Isroilning G‘azoga hujumlari davom etmoqda. Kelishuv kuchga kirganidan beri 1 500 nafardan ortiq falastinlik halok bo‘lgan.
G‘azo Sog‘liqni saqlash vazirligi ma’lumotlariga ko‘ra, 2023-yil oktyabridan buyon Isroil hujumlari oqibatida jami 74 594 nafar falastinlik halok bo‘lgan.
