Putinni NATOga taklif qilganman — Bill Klinton
Shuningdek, AQSH sobiq prezidenti alyansning Sharqqa kengaytirilishi to‘g‘ri qaror bo‘lganini aytdi.
AQSH sobiq-prezidenti Bill Klinton NATOning Sharqqa kengaytirish to‘g‘ri qaror bo‘lganini maʼlum qildi. Bu haqda u The Atlantic nashriga bergan intervyusida aytgan.
“So‘nggi vaqtlarda NATOning kengaytirilishini turli doiralarda tanqid qilishmoqda. Ularning fikricha, aynan shu omil Putinning Ukrainaga hujum qilishiga sabab bo‘lgan. ammo alyans kengaytirilishi bosqichma-bosqich bo‘lgan va men uni to‘g‘ri qaror deb hisoblayman”, – degan Klinton.
Sobiq prezident, shuningdek, uning bu qaroriga ko‘pchilik qarshi bo‘lganini taʼkidlagan.
“Men bu taklif (NATOni kengaytirish)ni berganimda ko‘pchilik boshqacha fikr bildirgan. Xususan, afsonaviy diplomat Jorj Kennan Berlin devori qulashi va Varshava shartnomasi tashkiloti tugatilishi bilan NATO o‘z funksiyasini bajardi deb hisoblagan. The New York Times tahlilchisi Tom Fridman esa alyansning kengayishi ortidan Rossiya o‘zini haqoratlangan deb xis qilishini va iqtisodiy tomondan o‘zini o‘nglab olgandan so‘ng biz dahshatli javob olishimizdan ogohlantirgandi”, – deb qayd etgan u.
Klintonning so‘zlariga ko‘ra, u qayta nizo yuz berish ehtimoli borligini bilgan. Shu bilan birga sobiq prezident Rossiyaning birinchi prezidenti Boris Yelsin va amaldagi rahbar Vladimir Putinni NATOga aʼzo bo‘lish uchun eshiklar ochiqligini aytganini maʼlum qilgan.
Avvalroq Rossiya bilan munosabatlar masalasida NATO davlatlari ikkiga ajralgani to‘g‘risida xabar berilgandi.
