Gonkongda maktab o‘quvchilari va o‘qituvchilari har kuni COVID-19'ga test topshiradi
Bu haqda Gonkong maʼmuriyati rahbari Kerri Lam maʼlum qildi.
Xitoy Xalq Respublikasining Gonkong maxsus maʼmuriy hududi hukumati maktab o‘quvchilari va o‘qituvchilarini har kuni koronavirusga testdan o‘tkazishni talab qiladi.
Kerri Lamning so‘zlariga ko‘ra, kunduzgi darslar qayta tiklanganidan so‘ng o‘quvchilar va o‘qituvchilar har kuni koronavirusga test topshirishlari kerak. Faqatgina COVID-19 test natijasi manfiy chiqqan o‘quvchilar va o‘qituvchilar darslarga qatnashishi mumkin.
Shu bilan birga, o‘quvchilar o‘rtasida COVID-19 testini o‘tkazish uchun 10 milliondan ortiq bepul to‘plamlar tarqatiladi. Mahalliy sog‘liqni saqlash boshqarmasi bayonotida aytilishicha, emlanmagan o‘quvchilar darsdan tashqari sport va musiqa kabi mashg‘ulotlarga borishga ruxsat berilmaydi.
Agar o‘quvchilar, o‘qituvchilar va maktab xodimlari umumiy sonida koronavirus bilan kasallanganlar ulushi 5 foizdan oshsa, kunduzgi bo‘limda darslarni to‘xtatish masalasi ko‘rib chiqiladi.
Gonkongda 20 apreldan o‘rta maktab o‘quvchilari uchun darslar qayta tiklanishi, may oyi boshidan esa boshlang‘ich sinf o‘quvchilari o‘z partalariga qaytishi kutilmoqda. Gonkongdagi 12 yoshdan 19 yoshgacha bo‘lgan o‘smirlarning deyarli 80 foizi koronavirusga qarshi to‘liq emlangan, 3 yoshdan 11 yoshgacha bo‘lgan bolalarning 30 foizi emlangan.
Rasmiy maʼlumotlarga ko‘ra, 10 aprel holatiga ko‘ra, Gonkongda mingdan ortiq yangi mahalliy koronavirus infeksiyasi holati va COVID-19 dan 56 kishi vafot etgan.
Gonkongda koronavirus infeksiyasi bilan kasallanganlarning umumiy soni 1,19 milliondan oshdi, shu bilan bog‘liq vafot etganlarning umumiy soni 8557 nafarga yetdi.
