Turkiya sog‘liqni saqlash turizmi sektorining daromadi 10 mlrd dollardan oshdi
Turkiyada davolanish ko‘plab mamlakatlarda, ayniqsa, Yevropa Ittifoqi aholisi orasida juda mashhur.
Bu haqda Antaliya xalqaro sog‘liqni saqlash turizmi va taʼlim assotsiatsiyasi (UASTED) rahbari Mexmet Kanpolat maʼlum qildi. Kanpolat mamlakat sog‘liqni saqlash turizmi sektori daromadining Prezident Rejep Tayyip Erdog‘an tomonidan 2023 yil uchun belgilangan maqsaddan oshib ketganini aytdi.
«Bu sohaning daromadi yiliga 10 mlrd dollardan oshdi», – dedi UASTED rahbari.
Tashkilot rahbarining aytishicha, xorijliklar Turkiyaga asosan tish davolash, onkologiya va estetik jarrohlik uchun keladi. Shuningdek, so‘nggi yillarda Turkiyada turkiy tilli davlatlardan bemorlar soni ko‘payganini taʼkidladi.
«Jahon sog‘liqni saqlash turizmi bozori 100 milliard dollarga etadi. So‘nggi o‘n yillikdagi sarmoyalar tufayli Turkiya sog‘lomlashtirish turizmi sohasida kuchli beshlikka kirdi», — dedi Kanpolat.
Shu bilan birga, u Ukrainada urush boshlanganidan beri Rossiyadan Turkiyadagi tibbiyot muassasalariga kelayotgan bemorlar soni ortganini qayd etdi.
«Ishonchim komilki, Rossiya va Ukraina o‘rtasidagi urush tugaganidan so‘ng ushbu davlat fuqarolarining Turkiyada davolanishga qiziqishi ortadi», — dedi UASTED rahbari.
