Test sinovi uchun to‘lov undirilmaydigan abituriyentlar toifasi kengaydi
2022-yil 1-iyundan boshlab 2 toifadagi abituriyentlardan test sinovi uchun to‘lov undirilmaydi.
Bu haqda Davlat test markazi axborot xizmati maʼlum qildi.
Prezidentning 2022-yil 20-apreldagi Farmoni bilan quyidagi 2 toifadagi abituriyentlar test sinovi uchun to‘lovdan ozod etildi:
— «Ijtimoiy himoya yagona reyestri» axborot tizimida ro‘yxatga olingan shaxslar va ularning farzandlari;
— «Yoshlar daftari»ga kiritilgan yoshlar.
Endilikda 2022-yil 1-iyundan boshlab mazkur 2 toifadagi abituriyentlardan ham test sinovi uchun to‘lov undirilmaydi.
Maʼlumot uchun, Prezidentning 2019-yil 14-maydagi qaroriga ko‘ra, test sinovlari tashkil etilayotgan o‘quv yilidan avvalgi yillarda taʼlim muassasalarini tugatgan abituriyentlardan test sinovlarida ishtirok etishi uchun bazaviy hisoblash miqdorining yarim baravari miqdorida to‘lov undiriladi.
Bunda quyidagi toifadagi abituriyentlardan to‘lov undirilmaydi:
— test sinovlari tashkil etilayotgan yilda taʼlim muassasalarini tugatgan abituriyentlar;
— nogironligi bo‘lgan shaxslar;
— to‘liq davlat taʼminotidagi shaxslar (“Mehribonlik” uyi va Bolalar shaharchasining bitiruvchilari).
