“Iloji bo‘lsa, ’GAI’ni bosib ketaveringlar”
Jizzaxlik haydovchilar YPX xodimlariga qarshilik ko‘rsatmoqchi bo‘ldi.
Jizzaxda ijtimoiy tarmoq orqali YPX xodimlariga qarshilik ko‘rsatishga chorlovchi audioyozuv tarqatgan haydovchilar sud qilindi. Bu haqda viloyat IIB axborot xizmati xabar berdi.
Qayd etilishicha, ularning maqsadi yo‘l haqini 5000 so‘mga oshirish bo‘lgan va haydovchilarni YPX xodimlariga qarshilik ko‘rsatishga chorlangan.
Mazkur ish yuzasidan o‘tkazilgan sudda ikki nafar shaxsga qonuniy jazo belgilandi. Sud ularning harakatini “Davlat organi xizmatchilariga nisbatan nosog‘lom fikr va norozilik kayfiyatini uyg‘otish, soha vakillarining sha’ni va qadr-qimmatini qasddan kamsitish va haqorat qilish” sifatida baholadi.
Jizzax shahrining “O‘ratepa” mahallasida yashovchi fuqoroga 8 sutka, Sharof Rashidov tumanining “Ziyokor” mahallasida yashovchi fuqaroga 10 sutka ma’muriy qamoq jazosi tayinlandi.
