Belarus Toshkentga qanday tramvay yetkazib bera oladi?
Avvalroq mamlakat Bosh vaziri Minsk tramvay yo‘li loyihalarida ishtirok etishga tayyorligini aytgandi.
Ma’lumki, 2023 yildan boshlab Toshkentda tramvay yo‘llarini qurish ishlari boshlanadi. Ayni kunlarda O‘zbekiston Respublikasida bo‘lib turgan Belarus bosh vaziri Roman Golovchenko 25 aprel kuni Abdulla Aripov bilan uchrashuvda Minsk tramvay bilan bog‘liq loyihalarda ishtirok etishga tayyorligini ma’lum qildi.
Shu kunlarda poytaxtimio‘da o‘tkazilayotgan “INNOPROM. Markaziy Osiyo” II xalqaro sanoat ko‘rgazmasida ko‘plab Belarus kompaniyalari ham ishtirok etmoqda. Ular orasida avtobus, tramvay va trolleybuslar ishlab chiqarish bilan shug‘ullanadigan “Belkommunmash” – BKM Holding ham bor. Zamon.uz ushbu yirik ishlab chiqarish birlashmasi bosh direktori Oleg Biyko bilan suhbat uyushtirdi.
BKM Holding: uning eksport geografiyasi va hamkorlari
— Faoliyatimizga salkam 50 yil bo‘ldi. Hozirda “Belkommunmash” ishlab chiqargan tramvaylardan Belarusdan tashqari, Qozog‘iston va Rossiyada ham foydalaniladi. Xususan, Qozog‘istonning Pavlodar shahrida biz ishlab chiqargan tramvaylar yuradi.
Mahsulot ishlab chiqarishda, asosan, Belarusning o‘zida yaratilgan ehtiyot qismlaridan foydalaniladi. Yevropa bilan bog‘liq so‘nggi voqealar (sanksiyalar)ning ta’siri, albatta, sezildi. Shu sababli, Gʻarbdan sotib oladigan komponentlarni Xitoydan xarid qilyapmiz. Ammo bu mahsulot sifatiga katta ta’sir o‘tkazmaydi.
Shu bilan birga, Yevropaga ham eksportimiz bor. Masalan, o‘tgan yili Bolgariyaga trolleybus yetkazib berganmiz. Bu yil Bosniya va Gersegovinadan ham trolleybuslarga buyurtma tushgan. Bundan tashqari, Buyuk Britaniyada – BKM Holding ishlab chiqargan elektrobuslardan foydalaniladi.
Tramvay narxi, uning boshqa raqobatchi mahsulotlardan afzalligi tramvay narxi o‘rtacha 350 ming yevro. Agarda unga qo‘shimcha qulayliklar (masalan, yozda kondisioner) qo‘shiladigan bo‘lsa, 500 ming yevrogacha boradi.
Fikrimcha, bizning boshqa kompaniyalarning shu turdagi mahsulotlardan farqi uning arzonligida bo‘lsa kerak. Masalan, asosiy raqobatchilarimizdan biri bo‘lgan Rossiya tramvaylaridan biz ishlab chiqargan mashinalar ancha arzon.
Kichik hajmli tramvay 28 o‘rindiqli, umumiy sig‘imi 165 kishiga mo‘ljallangan.
Albatta, bizni Toshkentda tramvay yo‘nalishi qayta ochilishi mumkinligidan xabarimiz bor. Agarda tenderda g‘olib bo‘lsak, eng sifatli mahsulotlarnt yetkazib beramiz.
Muallif: Jahongir QO'ZIYEV
