Rossiyada o‘zbekistonlik migrantga suiqasd uyushtirildi
Bemorning ahvoli og‘irligi aytilmoqda.
Rossiyaning Sankt-Peterburg shahrida o‘zbekistonlik migrant ko‘krak qafasidan pichoqlab ketildi. Bu haqda 78.ru xabar berdi.
Aytilishicha, 1989 yilda tug‘ilgan O‘zbekiston fuqarosi Krasnoye Selodagi kafe hududida bo‘lgan. Nomaʼlum shaxs to‘satdan uning ko‘krak sohasiga pichoq bilan urgan. Oqibatda o‘zbekistonlik migrant ko‘krak qafasining pichoq bilan kesilgan teshik jarohati va yurak jarohati bilan kasalxonaga yotqizilgan.
Qayd etilishicha, bemorning ahvoli og‘ir bo‘lgani sababli politsiyaning so‘roq qilish imkoni bo‘lmagan. Ayni paytda jinoyat ishi qo‘zg‘atish masalasi hal etilmoqda. Voqea joyidan barmoq va oyoq izlari topilgan. Ayblanuvchini qidirish ishlari olib borilmoqda.
