Inson aʼzolari va to‘qimalarining transplantatsiyasiga ruxsat etiladi
Qonun loyihasi Qonunchilik palatasining o‘tgan yilgi majlisida ko‘rib chiqilgan edi.
O‘zbekistonda endi tirik donor yoki inson murdasidan olingan aʼzolari transplantatsiyasiga ruxsat beriladi. Bu “Inson aʼzolari va to‘qimalarining transplantatsiyasi to‘g‘risida”gi qonun bilan belgilab qo‘yildi.
Mazkur hujjat inson aʼzolari va to‘qimalarining transplantatsiyasi sohasidagi munosabatlarni tartibga soladi.
Tirik donor yoki inson murdasidan olingan inson aʼzolari va (yoki) to‘qimalari transplantatsiya obyektlari bo‘lishi mumkinligi Qonunda isbotini topgan. Ularning ro‘yxati Vazirlar Mahkamasi tomonidan belgilanadi.
Sunʼiy ravishda yetishtirilgan aʼzolar transplantatsiya obyektlari bo‘lmaydi. Shuningdek, qonunning amal qilishi:
- insonning ko‘payishiga taalluqli bo‘lgan aʼzolar va to‘qimalarning transplantatsiyasiga;
- aʼzolar va to‘qimalarning autogen (bir shaxsning o‘zi tirik donor va retsipiyent bo‘ladi) transplantatsiyasiga;
- qon va uning tarkibiy qismlari donorligi sohasidagi munosabatlarga nisbatan tatbiq etilmaydi.
Maʼlumot o‘rnida, Ushbu Qonun loyihasi 2021-yil 2-noyabrdagi Qonunchilik palatasi majlisida ko‘rib chiqilgan edi.
