Turkmanistonda qo‘l ushlashib yurgan yigit-qizlar hibsga olinmoqda

 

Turkmanistonning Maryam shahrida o‘nlab juftliklar jamoat joylarida qo‘l ushlashgani uchun qo‘lga olindi. Bu haqda “Meduza” nashri xabar berdi.

 

Qayd etilishicha, politsiya xodimlari ularni “an’anaviy ijtimoiy me’yorlar”ni buzganlikda ayblagan. Hibsga olinganlar kelajakda o‘z his-tuyg‘ularini oshkora ko‘rsatmaslik va’dalariga imzo chekkanlari uchun qo‘yib yuborilgan. 

 

Ta’kidlanishicha, Turkmanistonda qo‘l ushlashish rasman taqiqlanmagan. Serdar Berdimuhamedov hokimiyatga kelganidan so‘ng mamkakatda aholi, ayniqsa, ayollarning xulq-atvori va tashqi ko‘rinishi ustidan nazorat kuchaytirilgan. Aprel oyidan boshlab lab kattalashtirish yoki tatuirovka kabi kosmetik operasiyalarga taqiq joriy qilingan. 

Davlat korxonalari xodimlari ishdan bo‘shatish tahdidi ostida kosmetikani rad etish to‘g‘risida tilxat yozishga majbur bo‘lishgan. O‘rta maktab o‘quvchilari o‘rtasida manikyur va pedikyurga yo‘l qo‘yilmasligi haqida "tushuntirish suhbatlari" o‘tkazilgan. 

Bundan tashqari, rasmiylar ayollarga avtomobilning oldingi o‘rindig‘iga o‘tirishni taqiqlagan. Haydovchilarga ham endilikda qarindoshlari bo‘lmagan ayollarni olib yurishiga ruxsat berilmaydi: yo‘l harakati polisiyasi ayollar bo‘lgan joyda mashinalarni to‘xtatib, haydovchi bilan qarindoshlik aloqalarini isbotlashni talab qila boshlagan.

Hukumatga yaqin manbalarga ko‘ra, rasmiylar ayollarning xorijga chiqishini taqiqlash masalasini ham ko‘rib chiqmoqda. Shunda ular xorijda davolanishga muhtoj bo‘lgan taqdirdagina Turkmanistonni tark etishlari mumkin bo‘ladi.