O‘zbekiston va Qirg‘izistonni bog‘lovchi maxfiy tunnel aniqlandi
Yashirin yo‘l uylarning birida joylashgani aytilmoqda.
O‘zbekiston va Qirg‘izistonni bog‘lovchi yana bir tunnel fosh etildi. Mazkur tunnel Qirg‘iziston Milliy xavfsizlik davlat qo‘mitasi xodimlari tomonidan aniqlangan.
Tunnelning Qorasuv tumanidagi uylardan birida joylashgani qayd etildi. 13 metr chuqurlikda joylashgan tunneldan o‘tish 2x1,7 metr o‘lchamdagi yo‘lak orqali taʼminlanadi. Uning umumiy masofasi — 177 metr.
Yerosti tunneli egasi Qirg‘iziston fuqarosi M.I.M. o‘tgan yilning sentyabr oyida R. ismli shaxs bilan tanishib, ikki davlat o‘rtasida tunnel qazishni maqsad qilgan.
Tunnel orqali Qirg‘izistondan O‘zbekistonga valyuta va tovarlar olib o‘tish rejalashtirilgan.
M.I.M. o‘z aybini inkor etmagan va huquqni muhofaza qiluvchi organlar bilan hamkorlik qilishga tayyorligini aytgan. Hozirda tergov ishlari davom etmoqda.
