Tashqi mehnat migratsiyasi agentligi ogohlantirish bilan chiqdi
Koreyada vaqtinchalik ishlash istagida bo‘lgan fuqarolar uchun EPS-Topik test imtihonlari bo‘lib o‘tmoqda.
Shu kunlarda Koreya Respublikasida vaqtincha mehnat faoliyatini amalga oshirish istagidagi fuqarolar uchun Toshkentda EPS-Topik test imtihonlari tashkil etilgan.
Test imtihonlarini adolatli o‘tkazish uchun Koreya Respublikasining Inson resurslarini rivojlantirish xizmati bilan hamkorlikda barcha texnik va tashkiliy choralar ko‘rilgan.
Xususan, Inson resurslarini rivojlantirish xizmati tomonidan test o‘tkazish uchun maxsus planshetlar keltirilgan bo‘lib, ushbu planshetdagi test savollari ishtirokchi qiyofasi avtomatik tarzda aniqlangandan keyin ochilishi (Face ID) tizimi ham joriy etilgan.
Shunga qaramay, bugungi kunga qadar boshqa fuqaro o‘rniga testga kirish va testda qo‘shimcha vositalardan foydalanishga urinish bilan bog‘liq 23 ta holat aniqlangan.
Inson resurslarini rivojlantirish xizmati talablariga muvofiq, test imtihoni qoidalarini buzgan fuqaro 3 yil davomida ushbu imtihonda qatnashish imkoniyatidan mahrum bo‘ladi hamda qonunchilikda belgilangan javobgarlikka tortilishi qayd etildi.
“Shu munosabat bilan, fuqarolarni imtihon jarayonida barcha tartib-qoidalarga rioya qilishga chaqiramiz”, deyiladi xabarda.
