Rossiya Ukrainaga hujum qildi: qurbonlar bor
Hujumlar oqibatida Kiyev va Xarkovda tinch aholi vakillari jarohatlandi.
Rossiya qo‘shinlari 24-oktyabrga o‘tar kechasi Ukrainaga 126 ta havo hujumi vositasi bilan hujum qildi. Ukraina harbiylari 101 ta dronni urib tushirgan yoki elektron vositalar yordamida zararsizlantirgan. Hujumlar oqibatida Kiyev va Xarkovda tinch aholi vakillari jarohatlangan.
Ukraina Qurolli kuchlari Harbiy-havo kuchlari ma’lumotiga ko‘ra, hujumlarda «Geran» va Shahed rusumidagi zarba beruvchi dronlar, jumladan, reaktiv apparatlar, «Banderol» rusumidagi aylanib uchuvchi o‘q-dorilar hamda «Parodiya» rusumidagi taqlidchi dronlar qo‘llangan.
Uchuvchisiz apparatlar Rossiyaning Shatalovo, Oryol, Kursk, Bryansk va Primorsko-Axtarsk hududlaridan, shuningdek, Rossiya nazoratidagi Donetsk va anneksiya qilingan Qrimdagi Gvardeyskoye hududidan uchirilgan.
Ukraina harbiy-havo kuchlari ma’lumotida dushman hujumi vositalarining 14 ta nuqtaga kelib urilgani, urib tushirilgan apparatlar qoldiqlari esa beshta nuqtaga tushgani qayd etilgan. Hujumlar hisobot e’lon qilinganidan keyin ham davom etgan.
Kiyev shahar harbiy ma’muriyati xabariga ko‘ra, poytaxtning Obolon tumanida dron hujumi oqibatida xususiy uy shikastlangan, ikki kishi jarohatlangan. Shuningdek, Rossiyaning navbatdagi hujumlaridan keyin shaharning Goloseyev va Solomenka tumanlaridagi ayrim hududlarda favqulodda elektr uzilishlari joriy etilgan.
Xarkov viloyati harbiy ma’muriyati rahbari Oleg Sinegubovning bildirishicha, 24-oktyabr kuni ertalab dron Xarkovning Industrial tumaniga zarba bergan. Oqibatda 64 yoshli ayol jarohatlangan. Hujumning boshqa oqibatlari aniqlashtirilmoqda.
Donetsk viloyati harbiy ma’muriyati rahbari Vadim Filashkinning ma’lum qilishicha, o‘tgan sutka davomida Rossiya armiyasining zarbalari oqibatida Slavyansk va Kramatorsk shaharlarida ikki nafar tinch aholi vakili halok bo‘lgan, yana 18 kishi jarohatlangan.
