O‘zbekiston yilning eng sayohatbop davlatlar ro‘yxatiga kiritildi
Amerikaning “Time” jurnali “Dunyoning eng zo‘r joylari” ro‘yxatini taqdim etdi.
Joriy yil uchun “Dunyoning eng zo‘r joylari” ro‘yxatini taqdim etgan Amerikaning “Time” jurnalidagi 50 ta mamlakat qatoridan O‘zbekiston ham o‘rin olgan.
Jurnal tomonidan SovetIttifoqidan mustaqil bo‘lganiga 30 yil bo‘lgan O‘zbekistondagi yangi loyihalar va ochilishlar xorijiy sayohatchilarga Markaziy Osiyo mamlakatini yanada qulayroq o‘rganish imkonini berishi qayd etilgan.
“2011-yilda ochilgan tezyurar poyezdlar tarmog‘i hozirda Xivaning qadimiy Ipak yo‘li bekatigacha kengaytirilmoqda, bu esa poytaxt Toshkentdan UNESCO'ning Butunjahon merosi ob’yektlariga sayohat qilishni osonlashtiradi. Ipak yo‘lining yana bir shahri Samarqandda joriy yilda kitobga o‘xshash yangi aeroport terminali ochildi”, deyiladi nashrning O‘zbekistonga keltirgan ta’rifida.
Xususan, joriy yilning kuzida ochiladigan 640 gektar maydonda joylashgan va Samarqand eshkak eshish kanalini o‘z ichiga olgan “Ipak yo‘li Samarqand” majmuasi ham tilga olingan. Kompleks tarkibiga 22 qavatli “Samarkand Regency Amir Temur” nomli dunyoning yetakchi mehmonxonasi va yana yettita mehmonxona kiradi.
