Prezident Afg‘onistonga eʼtibor susayganini qayd etdi
Shavkat Mirziyoyev xalqaro konferensiya ishtirokchilariga murojaat yo‘lladi.
O‘zbekiston Respublikasi Prezidenti Shavkat Mirziyoyev "Afg‘oniston: xavfsizlik va iqtisodiy taraqqiyot" xalqaro konferensiyasi ishtirokchilariga murojaat yo‘lladi.
Davlat rahbari ming yillar davomida o‘zbek va afg‘on xalqlari o‘zaro qo‘shnichilikda yashaganini alohida qayd etdi.
"Bizni umumiy madaniyat, maʼnaviy va tarixiy qadriyatlar, umumiy din va buyuk ajdodlar merosi birlashtirib turadi. Amudaryoning boshqa qirg‘og‘ida barqarorlik o‘rnatilmay turib O‘zbekiston va butun Markaziy Osiyo mintaqasida xavfsizlik va barqaror rivojlanishga erishib bo‘lmaydi", — degan Prezident.
Shavkat Mirziyoyev butun dunyoda Afg‘onistonga eʼtibor pasayayotganini taʼkidlagan.
Shu bilan birga O‘zbekiston yetakchisi dunyo hamjamiyatini Afg‘oniston muvaqqat hukumatining mamlakatni tiklash borasidagi saʼy harakatlarini qo‘llab quvvatlashga chaqirgan.
