Jamoatchilik O‘zbekistondagi sud tizimidan norozi
Prezident administratsiyasi rahbari Sardor Umrzoqov tomonidan Oliy sud yangi raisini jamoaga tanishtiruv jarayoni bo‘lib o‘tmoqda.
Yig‘ilishda maʼlum qilinishicha, sudlarning mustaqilligi borasida ko‘p yillar davomida savollar paydo bo‘lgan. Adolatsiz qarorlar natijasida tizimga shikoyatlar haddan tashqari ko‘payib ketgan. Shu maʼnoda bugungi yig‘ilish ham o‘ta tanqidiy ruhda o‘tayotgani maʼlum qilindi.
“Umid qilamizki, ushbu yangi tayinlov aynan ushbu muammolar yechimi hamda sud organlarini tubdan isloh qilish uchun xizmat qiladi”, — dedi Sardor Umrzoqov.
Prezident administratsiyasi yangi rahbariyati islohotlarni aynan sud tizimidan boshlagani bejiz emas. So‘nggi paytlarda aholi tomonidan tizim bo‘yicha shikoyatlar soni keskin ortib ketgani kuzatilmoqda.
Bundan avval Shavkat Mirziyoyev o‘z maslahatchisi Baxtiyor Islomov nomzodini Oliy sud raisi lavozimiga, Kozimjon Komilov nomzodini Konstitutsiyaviy sud sudyasi lavozimiga ko‘rsatib, Senatga taqdimnomalar kiritgandi.
Senatning o‘ttizinchi yalpi majlisida prezident Shavkat Mirziyoyev tomonidan taqdim qilingan nomzodlar lavozimga tasdiqlandi.
Maʼlumot uchun: Baxtiyor Islomov bungacha prezidentning huquqni muhofaza qiluvchi va nazorat organlari faoliyatini muvofiqlashtirish masalalari bo‘yicha maslahatchisi sifatida ishlab kelayotgandi.
