Litva rossiyaliklarning Yevroittifoqqa kirishiga qarshi
Mamlakat bu boʻyicha Estoniya hukumati qarorini qoʻllab-quvvatladi.
Litva Estoniya hukumatining rossiyaliklarning mamlakatga kirishini taqiqlash haqidagi qarorini qoʻllab-quvvatlaydi va uni butun Yevropa Ittifoqiga tatbiq etish kerak, deb hisoblaydi. Bu haqda Litva tashqi ishlar vaziri Gabriyelius Landsbergis maʼlum qildi.
“Litva doimiy ravishda agressiv davlatlarga qarshi sanksiyalar qoʻllash tarafdori boʻlib kelgan va cheklovlar Yevropa Ittifoqi darajasida qoʻllansa, yanada samaraliroq ishlaydi degan pozitsiyaga amal qiladi”, — deydi Litva tashqi ishlar vaziri.
Bayonotda aytilishicha, milliy xavfsizlik, viza berish va chegara nazorati kabi sohalar uchun masʼul boʻlgan Litva muassasalari hozirda Estoniya va Latviya tomonidan qabul qilingan qarorlarni baholamoqda. Estoniya va Latviyaning qarorlari Litvada amalda boʻlgan cheklovlarga mohiyatan juda oʻxshash.
