Italiyalik fuqaro bir vaqtning o‘zida 3 ta virus yuqtirdi
Bemorda koronavirus, OIV hamda maymunchechak infeksiyasi aniqlangan.
Italiyada 36 yoshli bemorga bir vaqtning o‘zida ham COVID-19, ham maymunchechak, ham OIV tashxisi qo‘yildi. Mutaxassislar buni tibbiyot tarixidagi ilk holat deb baholamoqda.
Ma’lum bo‘lishicha, Italiya fuqarosi bir muddat avval Ispaniyaga besh kunlik sayohatga borgan. Safardan qaytgach, to‘qqiz kun davomida tana harorati 39 darajaga ko‘tarilib, tomoq va bosh og‘rig‘i hamda holsizlikdan aziyat chekkan.
Tibbiy tekshiruvlar davomida unda COVID-19 qayd etilgan. Biroq shu kunning ikkinchi yarmida bemor chap qo‘lida toshmalar paydo bo‘la boshlagan.
Ertasi kuni esa deyarli butun tanani og‘riq beruvchi pufakchalar qoplagan. Qo‘shimcha tekshiruvlardan so‘ng u maymunechak virusi va OIV infeksiyasini ham yuqtirgani aniqlangan.
Organizmda aniqlangan infeksiyalarning bunday kombinasiyasi bemor salomatligiga qanchalik xavfli ta’sir ko‘rsatishi xususida hali hech qanday dalillar yo‘q.
“Aslida maymunchechakning OIVga chalingan bemorlarda qayd etilishi avvalroq ma’lum bo‘lgandi. Ammo bu kombinatsiyaga koronavirus ham qo‘shilishi mutaxassislar uchun yangilik bo‘ldi”, — deyiladi SSV Matbuot xizmati xabarida.
Ayni paytda olimlar mazkur holatni chuqurroq o‘rganish yuzasidan tegishli tadqiqotlar olib bormoqda.
