Misr va Qatar ShHTning muloqot bo‘yicha hamkori maqomini oldi
Joriy yilda Belarus tashkilotga to‘laqonli aʼzo bo‘lish uchun rasman ariza topshirdi.
Misr va Qatar Shanxay hamkorlik tashkilotining muloqot bo‘yicha hamkori maqomini oldi. Bu haqda O‘zbekiston TIV matbuot xizmati xabar berdi.
“14-sentabr kuni Toshkent shahrida Shanxay hamkorlik tashkiloti sammitiga tayyorgarlik ko‘rish doirasida Misr Arab Respublikasi va Qatar davlatiga ShHT muloqotida sherik maqomini berish to‘g‘risidagi memorandumlarni imzolash marosimi bo‘lib o‘tdi”, — deyiladi xabarda.
Hujjatlarni ShHT Bosh kotibi Chjan Ming, Misr tashqi ishlar vazirining birinchi o‘rinbosari Hamdi Sanad Loza va Qatar tashqi ishlar davlat vaziri Sulton bin Saad al-Mureyxi imzoladi.
Maʼlumot uchun: SHHT 2001 yilda tashkil etilgan xalqaro tashkilotdir. Unda Hindiston, Qozog‘iston, Xitoy, Qirg‘iziston, Rossiya, Tojikiston, Pokiston va O‘zbekiston ishtirok etadi. Kuzatuvchi davlatlar – Afg‘oniston, Belarus, Eron va Mo‘g‘uliston, hamkor davlatlar – Ozarbayjon, Armaniston, Kambodja, Nepal, Turkiya va Shri-Lanka. Joriy yilda Belarus SHHTga to‘laqonli aʼzo sifatida kirish uchun rasman ariza topshirdi.
