Mirziyoyev va Rahmon chegaradagi vaziyatni muhokama qildi
Muloqot, asosan, tojik-qirg‘iz chegarasidagi vaziyatning so‘nggi o‘zgarishlari haqida bo‘ldi.
Bugun, 20-sentabr kuni O‘zbekiston prezidenti Shavkat Mirziyoyev va Tojikiston prezidenti Emomali Rahmon o‘rtasida telefon orqali muloqot bo‘lib o‘tdi. Bu haqda Tojikiston prezidenti matbuot xizmati maʼlum qildi.
Maʼlum bo‘lishicha, suhbat chog‘ida davlat rahbarlari Samarqandda bo‘lib o‘tgan Shanxay hamkorlik tashkiloti Sammiti yakunlarini muhokama qildilar.
Tojikiston Prezidenti O‘zbekiston Respublikasi Prezidentiga samimiy qabul va anʼanaviy mehmondo‘stlik uchun minnatdorlik bildirdi hamda davlat rahbarlarining uchrashuvi yakunlari bo‘yicha qaror va hujjatlarning mustahkam paketi qabul qilinganini yuqori baholadi.
Shu bilan birga, Tojikiston prezidenti O‘zbekiston prezidentiga tojik-qirg‘iz chegarasidagi vaziyatning so‘nggi o‘zgarishlari haqida ham maʼlumot berdi.
Tomonlar strategik sheriklik va ittifoqchilik doirasidagi do‘stlik, yaxshi qo‘shnichilik va o‘zaro manfaatli hamkorlikka oid ayrim dolzarb masalalarni ham muhokama qildilar.
