Qozog‘iston Prezidentiga suiqasd uyushtirmoqchi bo‘lgan shaxs 17 yilga qamaldi
Unga nisbatan terrorchilik akti va giyohvand moddalar tashish bo‘yicha ayblovlar ham qo‘yilgan.
Qozog‘iston Prezidentiga suiqasd uyushtirmoqchi bo‘lgan fuqaro 17 yilga ozodlikdan mahrum etildi, deya xabar bermoqda Ostona shahar sudi matbuot xizmati.
Qayd etilishicha, 28-sentyabr kuni Ostona shahrida yopiq sud majlisi bo‘lib o‘tgan. Unda sudlanuvchiga nisbatan davlatga xiyonat qilish, yashirin tarzda o‘qotar qurollar olib o‘tish, portlovchi moddalarni noqonuniy ishlab chiqarishga tayyorgarlik ko‘rish hamda Qozog‘iston Respublikasi Prezidentining hayotiga tajovuz qilish kabi ayblovlar qo‘yilgan.
Shuningdek, jinoiy moddalar qatorida terrorchilik harakatiga tayyorgarlik ko‘rish, huquqni muhofaza qilish organlari va harbiy xizmatchilarning hayotiga tajovuz qilish kabi ayblovlar ham bor.
Eslatib o‘tamiz, joriy yilning aprel oyida Qozog‘iston Milliy xavfsizlik qo‘mitasi respublika prezidenti va yuqori martabali amaldorlarga suiqasd uyushtirishni rejalashtirgan xorijiy razvedka agenti hibsga olinganini e’lon qilgandi.
