Jahon banki Ukrainaga 500 million dollar ajratdi
Mablag'lar infratuzilmani qayta tiklashga yo'naltiriladi.
Jahon banki Rossiyaning keng ko'lamli bosqinidan kelib chiqqan favqulodda ehtiyojlarni moliyalashtirish uchun Ukrainaga qo'shimcha 500 million dollar ajratilishini e'lon qildi. Bu haqda "Reuters" yozmoqda.
“Rossiyaning harbiy harakatlari Ukraina infratuzilmasini, jumladan, suv, kanalizatsiya va elektr tarmoqlarini keng miqyosda vayron qilishda davom etmoqda, qish yaqinlashar ekan, bu muammolar Ukraina xalqini yanada xavf ostiga qo‘yadi”, — dedi Jahon banki guruhi prezidenti Devid Malpass.
Xabar qilinishicha, moliyalashtirishning yangi bosqichi asosiy davlat xizmatlarini qo‘llab-quvvatlash uchun sarflanadi.
Jahon banki Ukrainani favqulodda moliyalashtirish uchun 13 milliard dollar ajratdi, shundan 11,4 milliard dollar hozirgacha to‘liq to‘langan.
