Rossiya raketa hujumlari Ukraina havo mudofaasini kuchaytirishni talab qilyapti
Kiyev G‘arbdan havo hujumiga qarshi mudofaa tizimini ko‘paytirishni so‘radi.
Ukraina G‘arbdan havo hujumiga qarshi tizimlarni ko‘proq yetkazib berishni so‘ramoqda. Bu Rossiya raketa hujumlari kuchaygani fonida yuz bermoqda.
Xususan, Ukraina televideniyasidagi chiqishida mamlakat harbiy-havo kuchlari qo‘mondonligi rasmiy vakili Yuriy Ignat bu haqda gapirgan.
"Bizga havo hujumiga qarshi mudofaa tizimlari kerak. Biz ko‘p gapirgan Germaniyaning IRIS-T tizimlaridan ko‘proq zarur", — degan u.
Hozirgi vaqtda Berlin qo‘shimcha yana bir dona IRIS-T yetkazib bergani maʼlum qilingan. Ignatning so‘zlariga ko‘ra, bu tizimlari to‘liq ishlamoqda. Shu bilan birga rasmiy vakil Amerikaning NASAMS tizimlaridan ikki batareya berilayotganini, ammo bu yetarli emasligini taʼkidlagan.
