Janubiy Koreyada imtihon mojarosi: ta’lim vaziri iste’foga chiqdi
Ta’lim vaziri vaziyatga oldindan tayyorgarlik ko‘rilmagani uchun mas’uliyatni o‘z zimmasiga oldi.

Janubiy Koreya ta’lim vaziri Choy Kyo-jin universitetga kirish imtihonida sun’iy intellekt yordamida firibgarlikning oldini olish bo‘yicha ko‘rilgan shoshilinch choralar sabab yuzaga kelgan tartibsizliklar uchun javobgarlikni zimmasiga olib, iste’foga chiqdi. Prezident Li Je Myon uning iste’fosini qabul qildi.
Mamlakatda har yili o‘tkaziladigan Suneung universitetga kirish imtihoni payshanba kuni bo‘lib o‘tdi. To‘qqiz soatgacha davom etadigan imtihonda qariyb 500 ming nafar o‘quvchi qatnashdi. Ta’lim vazirligi ma’lumotiga ko‘ra, bu yil 111 nafar nomzodda foydalanish taqiqlangan aqlli qurilmalar aniqlangan.
Mojaroga bir hafta avval soliq hisobi bo‘yicha milliy imtihonda eng yuqori natijani qayd etgan 34 yoshli Han Von Sokning firibgarlik qilganini tan olishi sabab bo‘ldi. U imtihon savollarini mikrokamera orqali suratga olib, sun’iy intellektga yuborganini va javoblarini smartfon yordamida tekshirganini ma’lum qildi. Han 160 ta savoldan faqat bittasiga noto‘g‘ri javob bergan edi.
Shundan so‘ng rasmiylar Suneung imtihonida ham shunday holatlarning oldini olish uchun shoshilinch choralar ko‘rdi. Xususan, imtihon kuni mahalliy vaqt bilan soat 08:00 dan 15:00 gacha mamlakat bo‘ylab uch marta favqulodda ogohlantirish xabari yuborildi. Signallar telefonlar ovozsiz rejimda bo‘lganida ham yangradi. Faqat o‘chirilgan yoki samolyot rejimiga o‘tkazilgan qurilmalar bundan mustasno bo‘ldi.
Bu Janubiy Koreyada imtihonda firibgarlikning oldini olish uchun milliy favqulodda vaziyatlar ogohlantirish tizimidan ilk bor foydalanilishi bo‘ldi. Bundan tashqari, nomzodlardan kiyimlaridagi tugmalarni yopish talab qilindi, ko‘zoynaklar ham yashirin kameralar bor-yo‘qligiga tekshirildi.
Ko‘rilgan choralar qoidalarga muvofiq imtihon topshirayotgan o‘quvchilarda ham xavotir uyg‘otdi. Ayrim nomzodlar ko‘zoynaklari aqlli qurilma sifatida noto‘g‘ri talqin qilinishidan cho‘chib, imtihonga kontakt linzalarda kelishga qaror qilgan.
Choy Kyo-jin Yonhap agentligiga bergan bayonotida vazirlik vaziyatga oldindan tayyorgarlik ko‘rmagani uchun tanqiddan qochib qutula olmasligini ta’kidladi. U imtihon yakunlanganidan so‘ng yuzaga kelgan vaziyat uchun javobgarlik his qilayotganini bildirib, iste’foga chiqdi.
Prezident Li Je Myon esa amaldagi universitetga kirish imtihonlari tizimini isloh qilish zarurligini avval ham ta’kidlab kelgan.








