Norozilik namoyishlari ortidan Pekinda karantin choralari yumshatildi
Noyabr oxirida Xitoyning yirik shaharlarida koronavirus cheklovlariga qarshi namoyishlar bo‘lib o‘tgandi.
Pekinda 6 dekabrdan koronavirus cheklovlari yumshatildi. Xususan, poytaxt aholisi supermarket, savdo binolari va ayrim jamoat joylariga borishi uchun PSR-test topshirishi shart emas.
Bundan tashqari, turarjoy binolariga kirish uchun ham PSR talabi berkor qilindi. uylarda doimiy yashaydigan aholi QR-kod orqali maxsus dasturdan ham skaner qilishi shart emas.
Shu bilan birga internet-kafe, tungi klublar, trenajyor zallari va umumiy ovqatlanish joylariga kirish uchun koronavirus yo‘qligi to‘g‘risida test natijasini ko‘rsatish zarur. U 48 soatdan ko‘p bo‘lmagan muddatda topshirilgan bo‘lishi kerak.
Reuters agentligi maʼlumotlariga ko‘ra, ertaga, 7 dekabr kuni cheklovlarni yumshatish bo‘yicha 10 ta umummilliy chora-tadbirlar eʼlon qilinishi mumkin.
Noyabr oxirida Xitoyning ko‘plab shaharlarida COVID cheklovlariga qarshi namoyishlar bo‘lib o‘tdi.
