Hindiston TIV BMTni isloh qilishga chaqirdi
Tashkilotning Xavfsizlik kengashiga Osiyo, Janubiy Amerika va Afrika davlatlarini kiritish taklif qilinmoqda.
Hindiston TIV rahbari Subramanyam Jayshankar BMTni isloh qilishga chaqirdi. Diplomat Tashkilotning Xavfsizlik kengashiga Osiyo, Janubiy Amerika va Afrika davlatlarini kiritish kerakligini aytgan.
“Janubiy Amerika, Afrika Osiyo va kichik orollarda joylashgan rivojlanayotgan davlatlar Xavfsizlik kengashida ishonchli va doimiy vakillarga ega bo‘lishi kerak. Bundan buyon ularning kelajagi to‘g‘risidagi qarorlar bu davlatlar ishtirokisiz qabul qilinishi mumkin emas. Global institutlar, jumladan ushbu kengashning ish metodlari va jarayonlarini shaffof, xolis va hisobdor qilish kerak”, – degan vazir.
BMT faoliyatini isloh qilish masalasi Rossiyaning Ukrainaga harbiy agressiyasidan keyin bir necha bor ko‘tarildi. Xususan, Xavfsizlik kengashidan RFni chiqarib tashlash yoki unga yana bir necha davlatni qo‘shish taklifi mavjud.
BMT XKga hozirda beshta davlat — AQSH, Buyuk Britaniya, Fransiya, Rossiya va Xitoy doimiy aʼzo hisoblanadi. Ularda har qanday rezolyutsiya yoki qarorga veto kiritish huquqi bor.
