Rossiyaning eng boy amaldorlaridan biri mehmonxonada sirli o‘lim topdi
Ikki kun avval uning hamrohi ham o‘lik holda topilgani aytilmoqda.
Vladimir viloyati kengashi deputati Pavel Antov 65 yoshida vafot etdi. Deputat Hindistonda taʼtil vaqtini o‘tkazayotganida vafot etgan, deb yozadi TASS.
25-dekabr kuni u to‘rt kishidan iborat sayyohlik guruhi bilan dam olayotgan Odisha shtatidagi mehmonxona oynasidan tushib ketgani qayd etilgan.
Hind politsiyasi bu o‘z joniga qasd qilish bo‘lishi mumkinligini, Antom o‘limidan ikki kun oldin uning hamrohlaridan biri Vladimir Bidenov ham xuddi shu mehmonxonada o‘lik holda topilganini maʼlum qildi.
Shtat politsiyasi va Rossiyaning Kalkuttadagi bosh konsulligi Hindistonda ikki rossiyalikning o‘limida shubhali hech narsa ko‘rmayapti.
Maʼlumot o‘rnida, Pavel Antov — go‘sht va kolbasa mahsulotlari ishlab chiqaruvchi yirik kompaniya asoschisi edi. U 2018-yilda «Yagona Rossiya» partiyasidan Vladimir viloyati Qonunchilik kengashiga deputat etib saylangan va u yerda agrar siyosat, atrof-muhit va ekologiya qo‘mitasini boshqargan.
Deputat etib saylangan yili Antov 9,97 milliard rubllik daromadi bilan Forbes jurnali tomonidan tuzilgan Rossiyaning eng boy davlat xizmatchilari reytingida birinchi o‘rinni egallagandi. Keyingi yili bu reytingda u 26-o‘ringa tushgan.
