Paqildoqlar bolalarni ko‘rish qobiliyatidan butunlay mahrum qilishi mumkin — mutaxassis
SSV ogohlantirish bilan chiqdi.
Inson tabiatan o‘ziga ham, yaqinlariga ham yomonlikni ravo ko‘rmaydi. Ayniqsa, farzandlarini turli falokatlardan uzoq tutadi. Ammo Yangi yil arafasida avj olayotgan “paqildoq”lar mavsumida buning aksi kuzatilmoqda. Respublika ko‘z kasalliklari klinik shifoxonasi bosh shifokori Otabek Ikromov pirotexnika vositalaridan foydalanishning salbiy oqibatlari haqida maʼlumot berdi.
— Har yili Yangi yil arafasida va bayramdan keyingi kunlarda “paqildoq” va salyutlardan olingan jarohatlar tufayli birgina bizning shifoxonamizga yuzga yaqin og‘ir ahvoldagi bemorlar murojaat qiladi.
Yuz, qo‘l sohalarida og‘ir kuyish, ko‘zlar shikastlanishi va ko‘rish faoliyati qisman yoki butunlay buzilishi kuzatiladigan bunday bolalar, afsuski, tegishli muolajalardan keyin ham qator asoratlardan aziyat chekmoqda. Hatto bemorlardan bir qismi lahzalik zavq uchun umrbod nogironlikka mahkum bo‘lyapti.
Ko‘zning pirotexnika vositalari taʼsirida kuyishi bir necha darajaga bo‘linadi:
I daraja(yengil kuyish)da ko‘z terisi va shilliq qavati qizarishi, shishishi, eroziyalangan yuzalar shox pardada paydo bo‘lishi kuzatiladi. Bu alomatlar ko‘rish qobiliyatining pasayishiga olib keladi.
II daraja(o‘rtacha kuyish)da ko‘z shox pardasi va konyunktivasida pufakchalar hamda shox parda yuzasida xiralashish paydo bo‘ladi .
III daraja(og‘ir kuyish)da shox pardaning chuqur xiralashishi, qovoqlar nekrozi yuz beradi.
IV daraja(o‘ta og‘ir kuyish) barcha ko‘z to‘qimalarining chuqur nekrozi bilan kechadi.
"Shulardan kelib chiqib, ota-onalar va aziz farzandlarimizni yana bir bor ogohlikka chaqiramiz", deyiladi xabarda.
